Rafræn atkvæðagreiðsla stendur yfir 13.-20, mars 2025
Ég er innfæddur Eskfirðingur – 55 ára gamall, kvæntur Berglindi Steinu Ingvarsdóttir og eigum við þrjú börn. Ég er lærður ferðamarkaðsráðgjafi frá Ferðamálaskóla Íslands, leiðsögumaður fyrir Austurland, hreindýraleiðsögumaður, með rútupróf og hef starfað að einhverju leyti í öllum þessum geirum ferðaþjónustunnar undanfarin 30 ár.
Ég hef byggt upp og rekið Ferðaþjónustuna Mjóeyri ásamt konunni minni frá árinu 2004, sem er lítið fjölskyldufyrirtæki með gistingu í herbergjum og sumarhúsum auk þess að reka veitingastað í gömlu norsku síldarsjóhúsi. Ferðaþjónustan Mjóeyri er með ferðaskrifstofuleyfi og skipuleggur gönguferðir, veiði og skíðaferðir innanlands auk þess að reka veitingastaðinn Randulffs-sjóhús frá 2008.
Ég var hluthafi í rútufyrirtækinu Austfjarðaleið á árunum 2004-2014 sem um tíma rak siglingafyrirtækið Fjarðaferðir. Ég var hluthafi í Hótel Eskifirði frá 2016 til 2024, þannig að snertifletir mínir við ferðaþjónustu eru á flestum sviðum og fjölþættir.
Frá 2022-2024 sat ég í stjórn SAF sem aðalmaður, en síðastliðið ár hef ég verið varamaður í stjórn samtakanna.
Í rúm tuttugu ár hef ég verið meðlimur í SAF og undanfarin tvö ár hef ég starfað í stjórn samtakanna. Sá tími hefur verið mjög lærdómsríkur ekki síst vegna gríðarlegra áskorana vegna heimsfaraldurs og jarðhræringa bæði fyrir samtökin okkar og greinina. Ég hef litið á mig sem talsmann landsbyggðarinnar inn í stjórninni og hefur það oft komið sér vel. Ég er fulltrúi litlu fjölskyldu fyrirtækjanna sem eru út um allt Ísland og eru hryggjarstykkið í íslenskri ferðaþjónustu, ekki síður en stóru öflugu fyrirtækin okkar. Við þurfum á hvort öðru að halda.
Samtök ferðaþjónustunnar eru mikilvægasti samstarfsvettvangur fyrirtækja í ferðaþjónustu á Íslandi. Eins og áður segir hef ég verið undanfarin tvö ár í stjórn SAF. Á þeim tíma höfum við náð mjög góðum árangri í samskiptum okkar við stjórnvöld og eru samtökin að mínu viti með öfluga rödd inn í stjórnsýsluna og mark á okkur tekið, þó auðvitað megi alltaf gera betur.
Mjög mikilvægt er að sem flest ferðaþjónustufyrirtæki á Íslandi séu í SAF. Það styrkir greinina og þar með samtökin og er mjög mikilvægur þáttur í að styrkja rödd okkar við stjórnvöld. Það er einmitt eitt aðalhlutverk samtakanna að standa vörð um hagsmuni greinarinnar gagnvart sí aukinni skattlagningu og hertum kröfum á fjölmörgum sviðum og í mörgum greinum. Þessi rödd bjargaði því sem bjargað var í gegnum heimsfaraldurinn og fundum við í stjórninni að á okkur var hlustað.
Mikilvægustu verkefni stjórnar SAF næstu árin verður að verja fyrirtækin okkar fyrir auknum og oft óþarfa kröfum stjórnvalda, auk þess að opna augu almennings fyrir mikilvægi greinarinnar fyrir hagsæld og velferð almennings í landinu.
Ég hef haft töluverðar áhyggjur af menntamálum greinarinnar og verða samtökin að beita sér af hörku í þeim málefnum.
© 2025 SAMTÖK FERÐAÞJÓNUSTUNNAR. Allur réttur áskilinn.
