Miðvikudaginn 21. ágúst sl. bauð ferðaskrifstofunefnd SAF til opins félagsfundar. Málefni fundarins var almyrkvinn sem verður sjáanlegur frá Íslandi 12. ágúst 2026. Verður þetta í fyrsta sinn síðan árið 1954 sem almyrkvi sést á Íslandi og jafnframt fyrsti almyrkvinn sem sést frá Reykjavík síðan 17. júní 1433.
Líklegt er að almyrkvinn eigi eftir að draga að töluverðan fjölda gesta til Íslands, en sem dæmi má nefna að almyrkvinn 8. apríl sl. í Bandaríkjunum dró að sér fleiri milljónir gesta víðsvegar að úr heiminum. Eru þegar farin að heyrast tíðindi af gististöðum hér á landi sem eru uppbókaðir þann 12. ágúst 2026.
Stjörnu Sævar fór með himinskautum
Sævar Helgi Bragason, Stjörnu Sævar, deildi sinni upplifun af almyrkvum og verkefnum tengdum komandi almyrkva, en hann er líklega sá Íslendingur sem hefur séð flesta almyrkva. Sævar Helgi notaði einnig tækifærið og talaði um komandi norðuljósatímabil en samkvæmt rannsóknum er líklegt að næstu tvö norðurljósatímabil muni bjóða upp á mjög öflug norðurljós.
Gögn frá fundinum
Hér má finna upptöku frá fundinum ásamt hluta af glærunum sem Sævar Helgi kynnti á fundinum auk þess sem hægt er að fara inn á heimasíður sem hann heldur úti til fræðast enn frekar um almyrkvann og norðurljós:
- Upptaka frá fundinum
- Glærukynning Sævars Helga
- Almyrkvi á sólu á Íslandi 2026 | Sólmyrkvi 2026
- Iceland at Night
Ferðaskrifstofunefnd SAF þakkar Sævar Helga kærlega fyrir kynninguna sem ætti að nýtast ferðaþjónustunni til vöruþróunar og undirbúnings fyrir almyrkvann. Þá viljum við nota tækifærið og benda á nýja bók Sævars og Babak Tafreshi “Iceland at night” sem ætti að vera skyldulesning fyrir alla þá sem starfa í ferðaþjónustu og vilja fræðast um næturhiminn Íslands.
