Eitt ár er þar til Íslendingar upplifa almyrkva á sólu í fyrsta sinn síðan 1954. Um sögulegan atburð er að ræða því næsta tækifæri verður ekki fyrr en 170 árum síðar, árið 2196. Almyrkvinn er því einstakur atburður á ævi langflestra Íslendinga.
Almyrkvaslóðin liggur yfir vestasta og þéttbýlasta hluta Íslands. Innan hennar búa 290 þúsund manns sem munu öll upplifa almyrkva. Íbúar austan við slóðina sjá verulegan deildarmyrkva.
Við almyrkva á sólu breytist allt. Vindur, hitastig, ljós, litir og skuggar. Lífið bregst líka við og myrkvinn hreyfir við mannfólkinu.
Lengstur er almyrkvinn frá Látrabjargi, 2m 13s, en 2m 9s á vestast á Snæfellsnesi og 1m 48s á Reykjanestá. Á Höfuðborgarsvæðinu sést almyrkvi í 30s til 1m eftir því hvar athugandi er, eins og sjá má á vefnum solmyrkvi2026.is
Ljóst er að Ísland verður því sem næst uppselt þennan tiltekna dag. Næstu mánuði mun áhugi aðeins aukast og umfjöllun vaxa eftir því.
Hvað ef illa viðrar?
Fari svo að ský byrgi sýn njótum við samt helmingsins af einstakri upplifun. Við missum af sjónarspilinu þegar hin stórkostlega kóróna sólar birtist, en þess í stað skellur á myrkur í eina til tvær mínútur um miðjan dag. Ský við sjóndeildarhring gætu tekið á sig ryðrauðan blæ og náttúran bregst við. Einstakt og merkilegt, sama hvað.
Ef vel viðrar upplifum við saman eina allra stórfenglegustu sýningu náttúrunnar. Fegurð sem vart er hægt að lýsa í orðum.
Metnaðarfull fræðsluverkefni í undirbúningi
Almyrkvar á sólu laða ekki aðeins að fjölda ferðamanna, heldur vekja þeir mjög mikla athygli og áhuga heimafólks á öllum aldri, sér í lagi barna. Þess vegna eru í bígerð ýmis fræðsluverkefni fyrir skóla.
Staðið verður fyrir fræðslu fyrir leiðsögufólk og aðra í ferðaþjónustu þegar fram í sækir, bæði um myrkva og ljósmyndun þeirra.
Kort, myndir og traustar upplýsingar
Á eclipse2026.is og solmyrkvi2026.is eru nákvæmustu kortin af og traustustu upplýsingarnar um sólmyrkvann á Íslandi. Þar er m.a. gagnvirkt kort sem hægt er að smella á hvar sem er og fá upp nákvæmar tímasetningar. Á því sjást jafnframt skuggar sem landslag varpar kl. 17:45 12. ágúst 2026.
Ennfremur hafa verið útbúin nákvæm prentvæn kort sem nálgast má hér https://solmyrkvi2026.is/sogur/kort-af-islandi-fyrir-solmyrkvann-2026
Kort á ensku og myndir í prentvænni upplausn https://photos.app.goo.gl/smHRSPNyLnVaEgXU7
Kort á íslensku í prentvænni upplausn https://photos.app.goo.gl/eQFSy6sjbCKYCxdu5
Fjölmiðlum er frjálst að nýta allar myndir og kort af vefjunum og dreifa á eigin miðlum og samfélagsmiðlum. Í staðinn þætti okkur vænt um að fá hlekk á solmyrkvi2026.is og icelandatnight.is
Á eclipse2026.is og solmyrkvi2026.is eru sömuleiðis birtar reglulegar fréttir sem tengjast almyrkvanum á íslensku og ensku.
Sjá https://solmyrkvi2026.is/sogur og https://eclipse2026.is/stories
Öryggi augna
Sáraeinfalt er að fylgjast með sólmyrkva á öruggan hátt. Nota þarf sólmyrkvagleraugu til að fylgjast með deildarmyrkvanum en þegar almyrkvinn skellur á eru gleraugun fjarlægð og sett upp aftur að almyrkva liðnum. Afar brýnt er að fólk noti örugg sólmyrkvagleraugu sem uppfylla ISO 12312-2 öryggisstaðlinum og eru CE-merkt. Sjá ítarefni hér https://solmyrkvi2026.is/oryggi-augna
Nálgast má sólmyrkvagleraugu og annan búnað til sólskoðunar á https://solmyrkvagleraugu.is/ Fyrirtæki geta sérmerkt, óski þau þess.
Um solmyrkvi2026.is og eclipse2026.is
solmyrkvi2026.is og eclipse2026.is eru í eigu Iceland at Night (icelandatnight.is), lítils sprotafyrirtækis sem sérhæfir sig í þjónustu við næturferðamennsku og bestu norðurljósaupplýsingum sem völ er á.
