Kveðja frá Samtökum ferðaþjónustunnar
Góður félagi er fallinn frá. Frumkvöðullinn og hugsjónamaðurinn Hörður Sigurbjarnarson.
Hið glæsilega og framsækna fyrirtæki Harðar, Norðursigling, var stofnfélagi í Samtökum ferðaþjónustunnar. Í aldarfjórðung hefur Hörður verið virkur og öflugur félagsmaður og lagt margt gott af mörkum við að skapa ferðaþjónustu á Íslandi hagfelld rekstrarskilyrði. Hann var ötull talsmaður umhverfisverndar og orkuskipta, hvort sem var á sjó eða landi og talaði máli ferðaþjónustunnar á þeim vettvangi. Hörður var einnig iðinn talsmaður sanngjarns rekstrarumhverfis fyrir útgerðir farþegaskipa og var fulltrúi samtakanna í samræðum við stjórnvöld. Hörður var einn af þeim sem skoraðist ekki undan ábyrgð og lagði sig allan fram í þeim verkefnum sem hann tók að sér. Fyrir það ber að þakka.
Það er skarð fyrir skildi í íslenskri ferðaþjónustu, sem nú hefur misst einn sinn öflugasta liðsmann. Það verður ekki á færi hvers sem er að feta í fótspor Harðar Sigurbjarnarsonar. Hans verður sárt saknað.
Fyrir hönd Samtaka ferðaþjónustunnar vottum við fjölskyldu og vinum Harðar okkar dýpstu samúð og biðjum alla góða vætti að styrkja þau á þessari sorgarstundu.
Bjarnheiður Hallsdóttir, formaður
Gunnar Valur Sveinsson, verkefnastjóri
—
Minningargreinin birtist í Morgunblaðinu á útfarardegi, þriðjudaginn 23. október 2023.
