Samkomulag um ofbeldislausa og örugga skemmtistaði var undirritað föstudaginn 23. ágúst sl.. Markmið samningsins er að skemmtistaðir í Reykjavík séu ofbeldislausir og öruggir, fyrir alla gesti og starfsfólk.
Þetta er í fimmta sinn sem verkefnið er undirritað en að því koma Reykjavíkurborg, Neyðarlínan 112, Samtök ferðaþjónustunnar, Samtök reykvískra skemmtistaða, Lögreglan á höfuðborgarsvæðinu og Slökkvilið höfuðborgarsvæðisins.
Með samkomulaginu er stefnt að því að fyrirbyggja allt mögulegt ofbeldi á skemmtistöðum. Ofbeldi í hvaða mynd sem er er ekki liðið, þar með talið kynbundið ofbeldi, kynbundin og kynferðisleg áreitni, vændi og mansal, sem og ofbeldi sem byggist á kynþáttafordómum og öðrum fordómum eða hatri, svo sem í garð innflytjenda eða hinsegin fólks.
Aukið öryggi og betra samstarf
Samkomulagið var fyrst undirritað árið 2016 og áttu þá 17 skemmtistaðir aðild að samkomulaginu en í dag eru þeir 30 að tölu. Öryggi á skemmtistöðum er gífurlega mikilvægt málefni og með samkomulaginu er miðað að því að tryggja samskipti og samstarfi á milli aðila samkomulagsins.
Samkvæmt upplýsingum frá lögreglunni á höfuðborgarsvæðinu eru vísbendingar um að ofbeldisbrotum sem eru tilkynnt inni á skemmtistöðum, sem eru aðilar að samkomulaginu, hafi fækkað. Þá hafi boðleiðir orðið styttri, samskipti hafa aukist og betri skilningur er á milli allra aðila samkomulagins.
