Sigurvegarar forkeppni fyrir Norrænu nemakeppnina í matreiðslu og framreiðslu eru nú á leið til Grythyttan í Svíþjóð þar sem þeir keppa fyrir Íslands hönd dagana 17. – 19. apríl 2026. Þar mætast fremstu nemar Norðurlandanna í einni virtustu fagkeppni ungs fólks í greininni.
Í ár eru 45 ár frá því keppnin var fyrst haldin, árið 1981, en Ísland tók fyrst þátt árið 1986. Frá upphafi hafa Samtök ferðaþjónustunnar og MATVÍS átt í farsælu samstarfi í tengslum við fjármögnun og þátttöku í keppninni. Klúbbur matreiðslumeistara annast skipulag og framkvæmd Norrænu nemakeppninnar í matreiðslu og framreiðslu.
Forkeppnin fór fram laugardaginn 8. nóvember 2025 í Menntaskólanum í Kópavogi þar sem hæfileikaríkir nemar í matreiðslu og framreiðslu kepptu um sæti í landsliðinu. Keppnin var glæsileg og sýndi skýrt þann metnað, fagmennsku og sköpunarkraft sem einkennir nýja kynslóð fagfólks í íslenskum veitingageira.
Sterkt lið til leiks
Í matreiðslu tryggðu Hákon Orri Stefánsson, Fröken Reykjavík, og Aron Fannar Þrastarson, Nomy, sér þátttökurétt í keppninni. Í framreiðslu tryggðu Freyja Dröfn Bjarnadóttir, Oto, og Árný Lind Berglindardóttir, Kol Restaurant, sér þátttökurétt í keppninni.
Með liðinu til keppni fara reyndir þjálfarar sem gegna lykilhlutverki í undirbúningi og framvindu verkefnisins. Þjálfari matreiðslunema er Jakob Zarioh Sifjarson Baldvinsson og þjálfari framreiðslunema er Finnur Gauti Vilhelmsson.
Mikilvægur vettvangur fyrir framtíðina
Norræna nemakeppnin í matreiðslu og framreiðslu er einn mikilvægasti vettvangur ungra nema á Norðurlöndum. Þar fá keppendur tækifæri til að takast á við krefjandi verkefni, þróa faglega hæfni sína og byggja upp dýrmætt tengslanet sem nýtist þeim í framtíðinni.
Þátttaka Íslands í keppninni hefur í gegnum árin skilað góðum árangri og er mikilvægur liður í uppbyggingu næstu kynslóðar matreiðslumanna og framreiðslufólks. Keppnin er jafnframt mikilvægur mælikvarði á gæði menntunar og fagmennsku í greininni hér á landi.
Hlutverk Klúbbs Matreiðslumeistara
Klúbbur Matreiðslumeistara gegnir lykilhlutverki í undirbúningi og þátttöku Íslands í keppninni. Með markvissri vinnu við að styðja við ungt fagfólk, efla keppnishald og skapa vettvang fyrir þróun hæfileika leggur klúbburinn traustan grunn að áframhaldandi árangri Íslands á alþjóðavettvangi.
Þátttaka í keppni sem þessari er skýrt merki um bjarta framtíð íslenskrar matargerðar og þjónustu. Ný kynslóð fagfólks er tilbúin að taka við keflinu með metnað, kunnáttu og ástríðu að leiðarljósi.
Samtök ferðaþjónustunnar og MATVÍS eru eigendur og bakhjarlar Norrænu nemakeppninnar á Íslandi.
Ljósmyndir: Mummi Lú
