Yfirlýsing frá Samtökum ferðaþjónustunnar
Samtök ferðaþjónustunnar skora á stjórnvöld að eiga jákvætt samtal við fulltrúa greinarinnar um hvernig blómstrandi ferðaþjónusta getur skilað enn stærri sneið til samfélagsins.
Ferðaþjónusta á Íslandi er kraftmikil atvinnugrein sem hefur á undanförnum árum náð eftirtektarverðum árangri. Hún er ein stærsta atvinnugrein landsins, ábyrg fyrir þriðjungi útflutningstekna Íslands og skapar tugþúsundir starfa. Ferðaþjónusta hefur kveikt líf og fjölbreytni um land allt, ekki síst á landsbyggðinni, þar sem greinin hefur búið til ný tækifæri og byggt upp fjölbreytta þjónustu.
Við í ferðaþjónustunni erum stolt af þessum árangri og viljum halda áfram. Aukin gjaldtaka og skortur á fyrirsjáanleika minnkar hins vegar ávinning samfélagsins af atvinnugreininni, dregur úr mætti ferðaþjónustu, seiglu og samkeppnishæfni, skaðar fjárfestingar í gæðum og framtíðaruppbyggingu og hefur neikvæð áhrif á nærsamfélög um allt land.
Jákvæðar leiðir til að afla sömu eða hærri tekna fyrir ríki, sveitarfélög og samfélagið allt eru vel þekktar, raunhæfar og árangursríkar leiðir sem styðja við markmið ferðamálastefnu og atvinnustefnu ríkisstjórnarinnar. Ferðaþjónustan skorar því á stjórnvöld að vinna markvisst með atvinnugreininni að því að auka tekjur samfélagsins af henni.
Blómleg ferðaþjónusta sem skilar fjölbreyttri uppbyggingu í blómstrandi samfélögum um allt land og ríflegum tekjum í ríkissjóð eru sameiginlegir hagsmunir okkar allra. Við hlökkum til þess að eiga árangursríkt samtal og samstarf með stjórnvöldum um hvernig megi skapa meira virði, auknar tekjur og stöðugleika til langs tíma.
