Samtök ferðaþjónustunnar hafa skilað inn umsögn um tillögu fjármála- og efnahagsráðherra til þingsályktunar um fjármálaáætlun fyrir árin 2027–2031. Í umsögninni gera SAF alvarlegar athugasemdir við fyrirhuguð áform stjórnvalda gagnvart ferðaþjónustunni og kalla eftir meira fyrirsjáanleika í rekstrarumhverfi atvinnugreinarinnar.
SAF gagnrýna sérstaklega boðaða hækkun virðisaukaskatts á aðgang að baðlónum og fyrirhuguð ný heildarlög um gjaldtöku á ferðamannastöðum. Samtökin telja að áformin geti dregið úr samkeppnishæfni íslenskrar ferðaþjónustu, aukið óvissu og haft neikvæð áhrif á verðmætasköpun og atvinnu, sérstaklega á landsbyggðinni.
Í umsögninni benda SAF meðal annars á að ferðaþjónusta sé stærsta útflutningsgrein landsins, hafi skapað um 31 þúsund störf árið 2025 og skilað um þriðjungi af heildarútflutningstekjum Íslands.
SAF kalla eftir því að fallið verði frá hækkun virðisaukaskatts á baðlón og að ný gjaldtaka á ferðamannastöðum verði útfærð með skynsamlegum hætti, í fullu samráði við atvinnugreinina og með tilliti til þeirra skatta og gjalda sem þegar eru til staðar.
Hér að neðan má nálgast umsögn SAF um fjármálaáætlun ásamt samantekt samtakanna.
