Þann 21. apríl kl. 14:00 verður Dagur ábyrgrar ferðaþjónustu haldinn í hátíðarsal Grósku. Viðburðurinn er vettvangur til að staldra við, horfa yfir farinn veg og ræða hvert við viljum stefna í þróun ferðaþjónustu á Íslandi.
Undanfarin ár hefur mikil vinna verið lögð í að efla ábyrga ferðaþjónustu – með aukinni vitund, skýrari viðmiðum og sterkari samvinnu innan greinarinnar. Nú er komið að næsta kafla: að byggja á þessum grunni og móta framtíð sem einkennist af sjálfbærni, nýsköpun og raunverulegri ábyrgð gagnvart náttúru, samfélagi og gestum.
Á dagskrá verða fjölbreytt og lifandi samtöl þar sem rödd greinarinnar fær að heyrast. Við fáum innsýn frá aðilum innan ferðaþjónustunnar, sem deila reynslu sinni og sýn á framtíðina. Einnig verður sérstakt samtal við forseta Íslands, Höllu Tómasdóttur, þar sem ábyrg ferðaþjónusta verður rædd í stærra samhengi samfélags og framtíðar.
Hápunktur dagsins verður afhending hvatningaverðlauna til framúrskarandi fyrirtækis í ábyrgri ferðaþjónustu. Verðlaunin eru veitt til að vekja athygli á góðum fyrirmyndum og hvetja til áframhaldandi framfara í greininni.
Opið er fyrir tilnefningar til hvatningaverðlaunanna, og hvetjum við öll til að senda inn tillögur að fyrirtækjum sem hafa skarað fram úr í ábyrgum rekstri.
Við hlökkum til að sjá ykkur í Grósku þar sem við ræðum stöðuna, deilum reynslu og mótum saman næstu skref í átt að enn ábyrgari ferðaþjónustu.
