Ferðaþjónustudagurinn

Ferðaþjónustudagurinn er í senn uppskeruhátíð atvinnugreinarinnar að hausti og ráðstefna þar sem rýnt er í stöðu og horfur greinarinnar, þróun hennar greind og rædd og framtíðin krufin. 

Meðal málefna sem fjallað hefur verið um á ferðaþjónustudeginum síðustu ár er gjaldtaka af ferðamönnum, gervigreind og stafræn þróun, mannauðsmál, hæfni og fagmennska, skemmtiferðaskipakomur, álagsstýring, sjálfbærni og umhverfismál, stefnumótun og framtíðarsýn greinarinnar, efnahagsmál og sýn stjórnmálanna á þróun greinarinnar, áhrif ferðaþjónustu á samfélagið svo eitthvað sé nefnt.

Árið 2023 var haldin 25 ára afmælisráðstefna þar sem boðið var upp á fjölda viðburða með lotufyrirkomulagi í fjórum þemum. Ráðstefnan var sú stærsta sem haldin hefur verið um ferðaþjónustu á Íslandi. 

Árið 2024 var Ferðaþjónustudagurinn haldinn í samvinnu við Ferðamálastofu, Umhverfisstofnun, Vatnajökulsþjóðgarð og Þingvallaþjóðgarð, þar sem fjallað var um Álagsstýringu á fjölförnum áfangastöðum. Rúmlega 300 manns úr fyrirtækjum og stjórnkerfinu tóku þátt í heils dags ráðstefnu með fyrirlesurum frá fjórum löndum, ásamt vinnustofu þar sem tekist var á við raunhæf verkefni úr íslenskri ferðaþjónustu. 

SAF leggja áherslu á að Ferðaþjónustudagurinn styðji við og ýti undir raunhæfa umræðu um stöðu og framtíð ferðaþjónustu í samhengi við efnahagsmál og samfélagið.