Samtök ferðaþjónustunnar leggjast alfarið gegn fyrirhugaðri hækkun virðisaukaskatts á baðlón úr 11% í 24%. Breytingin veikir samkeppnishæfni íslenskrar ferðaþjónustu, eykur óvissu í rekstrarumhverfi fyrirtækja og vinnur gegn verðmætasköpun og dreifingu ferðamanna um landið.
Baðlón eru ein helsta sérstaða landsins sem áfangastaðar og uppbygging þeirra hefur skapað störf, fjárfestingu og nýja áfangastaði um allt land. Áhrif skattahækkunarinnar einskorðast ekki við baðlón. Ferðamaður, innlendur eða erlendur, sem heimsækir baðlón gistir, borðar, ferðast og sækir aðra afþreyingu. Verðmætin verða því til víða og áhrifin líka, sér í lagi á landsbyggðinni.
Þessi skattahækkunaráform eru sett fram án samráðs, án fyrirvara, án áhrifamats og þvert á gefin loforð ríkisstjórnarinnar.
Skattahækkanir lifa ekki í tómarúmi
Fjölmargir innan og utan ferðaþjónustunnar hafa fjallað um stöðu greinarinnar, fyrirhugaða skattahækkun og áhrif aukinnar gjaldtöku á atvinnugreinina að undanförnu. Lestu greinarnar með því að smella á hlekkina hér að neðan.
Ríkisstjórnin pissar aftur í skattaskóinn – Jóhannes Þór Skúlason, framkvæmdastjóri SAF:
„Ferðaþjónusta er ein af meginstoðum efnahagslífsins og skilar um 200 milljörðum króna í skatttekjur til hins opinbera árlega. Rekstrarumhverfið hefur hins vegar þyngst verulega og í slíku umhverfi er hækkun skatta og gjalda ekki aðeins slæm atvinnustefna, heldur líka arfaslök efnahagsstefna.“
Hver þorir næst? – Knútur Emil Jónasson, oddviti sveitarstjórnar Þingeyjarsveitar, Dagmar Ýr Stefánsdóttir, sveitarstjóri Múlaþings, Hermann Ingi Gunnarsson, oddviti sveitastjórnar Eyjarfjarðarsveitar, Unnur Brá Konráðsdóttir, sveitarstjóri Borgarbyggðar, Jóhanna Hreinsdóttir, sveitarstjóri Kjósarhrepps, Ásta Stefánsdóttir, sveitarstjóri Bláskógabyggðar, Aldís Hafsteinsdóttir, sveitarstjóri Hrunamannahrepps, Bergþór Bjarnason, sveitarstjóri Norðurþings og Haraldur Þór Jónsson, oddviti sveitarstjórnar Skeiða- og Gnúpverjahrepps:
„Við getum flest verið sammála um eitt: Landsbyggðin verður sterkari þegar ný fyrirtæki verða til þar, heilsársstörfum fjölgar og verðmætasköpun eykst. Þess vegna eigum við erfitt með að sjá hvernig fyrirhuguð hækkun virðisaukaskatts á baðlón úr 11% í 24% styður við áframhaldandi uppbyggingu, fjárfestingar og aukna verðmætasköpun á landsbyggðinni.“
Ekki éta útsæðið – Jóhannes Þór Skúlason, framkvæmdastjóri SAF
„Ísland stefnir því í að verða ferðamannaskattaglaðasta land heims, eina landið þar sem ferðamenn greiða þrjá mismunandi ferðamannaskatta með nákvæmlega sama markmiðinu. Og af einhverjum ástæðum skila skatttekjurnar sér illa til þeirra verkefna sem markmiðin tilgreina. Og hverjum er það að kenna? Tjah, ekki ferðaþjónustufyrirtækjum.“
Ef Ísland væri gosdrykkur – Geir Gígja, ferðamálafræðingur
„Íslensk stjórnvöld ættu að nálgast ferðaþjónustuna með sama hætti. Ekki sem ótæmandi skattstofn, heldur einmitt sem verðmæta en viðkvæma útflutningsvöru á einum samkeppnisharðasta markaði heims.“
Kynslóðaskipti í ferðaþjónustu: Ástríða dugar ekki ein og sér – Díana Mjöll Sveinsdóttir, framkvæmdastjóri Tanna Travel, og Sveinn Sigubjarnarson, verkefnastjóri Tanna Travel
„Við þurfum rekstrarumhverfi þar sem fjölskyldufyrirtæki og frumkvöðlar geta vaxið og dafnað og að yngri kynslóðir sjái tækifæri í því að stofna eða taka við fyrirtæki í heimabyggð. Þannig dreifist verðmætasköpunin um landið og þekkingin helst í samfélögunum.“
Aukin gjaldtaka vinnur gegn dreifingu ferðamanna – Sara Sigmundsdóttir, framkvæmdastjóri Akureyri Whale Watching
„Aukin gjaldtaka og möguleg hækkun virðisaukaskatts á ferðaþjónustu eru ekki tæknileg smámál. Þau hafa bein áhrif á tekjur fyrirtækja á landsbyggðinni, auka árstíðarsveifluna og vinna gegn dreifingu ferðamanna um landið.“
Ferðaþjónustan er ekki endalaus tekjulind fyrir ríkissjóð – Björn Ragnarsson, forstjóri Icelandia
„Stjórnvöld þurfa að horfast í augu við þessa stöðu. Það er ekki hægt að tala um verðmætasköpun, byggðafestu og öfluga ferðaþjónustu á sama tíma og sífellt er bætt á greinina nýjum gjöldum, nýjum sköttum og aukinni óvissu.“
Hvað varð um planið? – Pétur Óskarsson, formaður SAF
„Ef ríkisstjórnin trúir á eigin atvinnustefnu á hún að styðja við útflutningsgrein sem skapar verðmæti um allt land, halda sig við planið og ekki veikja samkeppnisstöðu hennar með illa ígrunduðum skattahækkunum.“
Horn í síðu fyrirtækjareksturs – Diljá Matthíasardóttir, hagfræðingur SAF
„Það er ótækt að fyrirtækjarekendur þurfi á ári hverju að búa við óþarfa óvissu um hvaða skatt stjórnvöldum dettur í hug að leggja á eða hækka næst. Næg er sú ytri óvissa sem steðjar að og enginn veit hvað morgundagurinn ber í skauti sér. Það er eðlileg krafa fyrirtækja að óska eftir meiri fyrirsjáanleika frá stjórnvöldum, auknar álögur geta ekki alltaf verið svarið.“
Virðisaukaskattur er frábært fyrirbæri! – Ásta Kristín Sigurjónsdóttir, framkvæmdastjóri Íslenska ferðaklasans
„Hagfræðin er í raun einföld: lægra skattþrep á verðmæta þjónustu getur aukið eftirspurn, aukið heildartekjur og þar með skilað meiri skatttekjum til lengri tíma. Hærra skattþrep getur haft öfug áhrif.“
Baðlónabullið – stjórnvöld hlaupast undan ábyrgð – Pétur Óskarsson, formaður SAF
„Þvert á móti stendur til að þyngja rekstur eins dýrmætasta sprota greinarinnar, baðlónanna. Ábyrgðarleysi og skeytingarleysi ríkisstjórnarinnar gagnvart raunveruleikanum virðast engin takmörk sett.“
Galin skattheimta ríkisstjórnarinnar – Bjarnheiður Hallsdóttir, framkvæmdastjóru Kötlu DMI og fyrrv. formaður SAF
„Miðað við núverandi stöðu ferðaþjónustu á Íslandi, getur það þá talist skynsamlegt að hækka skatta og gjöld á ferðamenn svona mikið á svona stuttum tíma? Er það líklegt að verðmætasköpun greinarinnar muni aukast með auknum álögum og að hún skili þar með meiri tekjum til ríkisins? Er ríkisstjórnin með þessu að stuðla að heilbrigðu rekstrarumhverfi, fjárfestingu, nýsköpun, nýjum störfum og arðsemi í ferðaþjónustu? Efla þessir skattar og þessi gjöld samkeppnishæfni greinarinnar, sem er yfirlýst markmið stjórnvalda? Svarið við öllum þessum spurningum er NEI og aftur NEI. Þetta getur bara talist glórulaus vinstri vitleysa.“
